திரைவிமர்சனம்: கர
- வேகம் குறைந்த விதியின் ஆட்டம்!
இயக்கம்: விக்னேஷ் ராஜா
இசை: ஜி.வி. பிரகாஷ் குமார்
நடிப்பு: தனுஷ், சுராஜ் வெஞ்சரமுடு, மமிதா பைஜூ, ஜெயராம்.
கதைக்களம்:
1990-களின் பின்னணியில், ஓட்டைப் பிரிப்பதிலும் பூட்டை உடைப்பதிலும் கைதேர்ந்த ஒரு யதார்த்தமான திருடனாக தனுஷ். "இந்த ஒரு திருட்டோடு தொழிலை விட்டுவிடலாம்" என்று நினைக்கும்போது விதி விளையாடுகிறது. கைதாகி தப்பிக்கும் நாயகன், ஏன் ஒரு தொடர் கொள்ளையனாக மாறுகிறான்? அவனது வாழ்வை மாற்றிய அந்த 'விதியின் கணக்கு' என்ன என்பதுதான் இந்த 'கர'.
நடிப்பு அசுரன்:
ஆர்ப்பாட்டம் இல்லாத அறிமுகம் முதல் இறுதி வரை, கதாபாத்திரத்தின் தன்மையை உணர்ந்து மிரட்டியிருக்கிறார் தனுஷ். வங்கியைக் கொள்ளையடிக்கும் திட்டமிடலாகட்டும், போலீசிடம் அடிவாங்கும் இடங்களாகட்டும், தனுஷின் நடிப்பு 'பக்கா'. ஆனால், ஒரு மாஸ் ஹீரோவை இவ்வளவு இயல்பாகக் காட்டியதால், பல இடங்களில் 'ஹீரோயிசம்' மிஸ்ஸிங் என்பது ரசிகர்களுக்கு ஏமாற்றமே.
பலம் சேர்த்த நட்சத்திரங்கள்:
சுராஜ் வெஞ்சரமுடு: போலீஸ் டிஎஸ்பியாக இவரது நடிப்பும், கூர்மையான வசனங்களும் படத்திற்கு பெரும் பலம்.
கே.எஸ்.ரவிக்குமார்: அப்பாவாக வரும் இவரது நடிப்பு பிரமாதம்.
மமிதா பைஜூ: கிராமத்து பெண்ணாக ஆச்சரியப்படுத்துகிறார், ஆனால் அவருக்கு இன்னும் வேலை இருந்திருக்கலாம்.
ஜெயராம்: வங்கி மேலாளராக இவரது யதார்த்தமான வில்லத்தனம் கவனிக்க வைக்கிறது.
கருணாஸ், எம்.எஸ்.பாஸ்கர் & பிருத்வி: அனைவரும் தங்களுக்குக் கொடுக்கப்பட்ட வேலையைச் சரியாகச் செய்துள்ளனர்.
தொழில்நுட்பம்:
90-களின் காலக்கட்டத்தை அப்படியே கண்முன்னே நிறுத்தியிருக்கிறது 'Art Department'. ஜி.வி. பிரகாஷின் பின்னணி இசை முதல் பாதியில் காட்சிகளுக்கு வேகம் கூட்டுகிறது. "கண்ணம்மா" பாடல் மனதில் நிற்கிறது.
சறுக்கிய இடங்கள்:
வங்கி கொள்ளைக்கான அந்த விறுவிறுப்பும், பரபரப்பும் திரைக்கதையில் மிஸ்ஸிங். வங்கிக் கடனை அடைக்கவே திருடுகிறார் என்பது ரசிகர்களுடன் பெரிய அளவில் கனெக்ட் ஆகவில்லை.
இரண்டாம் பாதியில் திரைக்கதை மெதுவாக நகர்வது பலவீனம். கிளைமாக்ஸில் வங்கியின் சிஸ்டம் தவறு என்பதைச் சொல்ல முயலும் இயக்குனர், அதற்கான வலுவான காட்சிகளை வைக்கத் தவறிவிட்டார்.
பாசிட்டிவ் நோட்:
'இட்லி கடை'யைத் தொடர்ந்து, இந்தப் படத்திலும் நாட்டார் தெய்வ வழிபாட்டை ஊக்கப்படுத்தும் நாயகன் தனுஷிற்கு ஒரு ராயல் சல்யூட்!
பாட்டம் லைன்:
'போர் தொழில்' இயக்குநரின் படம் என்கிற எதிர்பார்ப்புடன் சென்றால் ஏமாற்றம் இருக்கலாம். ஆனால், ஒரு வித்தியாசமான கொள்ளை முயற்சியையும், தனுஷின் எதார்த்த நடிப்பையும் பார்க்க விரும்புபவர்கள் ஒருமுறை 'கர' ஏறலாம்!
ரேட்டிங்: 2.75 / 5
எழுத்தாளன்: ராஜா K.S.
கருத்துகள் இல்லை:
கருத்துரையிடுக