த்ரிஷ்யம் 3 (Drishyam 3) – பில்டப் 'மகா' சம்பவம், படம் 'மினி' சம்பவமா?
மலையாள சினிமாவின் மாபெரும் எதிர்பார்ப்பான 'த்ரிஷ்யம் 3' தியேட்டர்களில் வெளியாகியிருக்கிறது. ஜார்ஜ்குட்டி அண்ணனின் குடும்பத்திற்கு இனி என்ன நடக்கப்போகிறது என்பதை அறிய, ரசிகர்களின் ஏகப்பட்ட எதிர்பார்ப்புகளுக்கு மத்தியில் அரங்கு நிறைந்த காட்சிகளாக படம் திரையிடப்பட்டு வருகிறது. படம் எப்படி இருக்கிறது? பார்ப்போம்.
கதைக்களம் & முதல் பாதி (First Half)
முந்தைய இரண்டு பாகங்களின் தொடர்ச்சியாகவே இந்த மூன்றாம் பாகமும் பயணிக்கிறது. ஜார்ஜ்குட்டி மற்றும் அவரது குடும்பத்தை சுற்றியிருக்கும் போலீஸ் வளையம் இன்னும் விலகவில்லை.
படத்தின் முதல் பாதி மிகவும் நிதானமாக, 'அடுத்து என்ன நடக்கப்போகிறது?' என்கிற ஒருவித பயத்தையும், பதற்றத்தையும் கொஞ்சம் கொஞ்சமாக பார்வையாளர்களுக்குள் கடத்துவதில் இயக்குனர் வெற்றி பெற்றிருக்கிறார். குறிப்பாக, இடைவேளைக் காட்சி (Interval Block) மிகச்சிறப்பாக வடிவமைக்கப்பட்டிருக்கிறது. தியேட்டரில் அடுத்த பாதி மீதான எதிர்பார்ப்பை அது எகிற வைக்கிறது.
இரண்டாம் பாதி (Second Half) – எங்கே சறுக்கியது?
முதல் பாதியின் பில்டப்பைப் பார்த்துவிட்டு, இரண்டாம் பாதியில் ஜார்ஜ்குட்டி ஏதோ ஒரு 'மகா' சம்பவம் செய்யப்போகிறார் என்று ஆவலோடு உட்கார்ந்தால், அங்கேதான் படம் கொஞ்சம் சோதிக்கிறது.
திரைக்கதை நகரும் வேகம் மிகவும் குறைவு. ஜார்ஜ்குட்டி தனது திட்டங்களை வகுக்கும் காட்சிகள் சுவாரசியமாக இருந்தாலும், முந்தைய பாகங்களில் இருந்த அந்த 'சீட் எட்ஜ்' த்ரில்லிங் வேகம் இதில் மிஸ்ஸிங். படம் முழுக்க பெரிய அளவில் பில்டப் கொடுக்கப்பட்டாலும், அதற்கேற்ற அழுத்தமான காட்சிகள் இல்லாததால், கடைசி அரை மணி நேரத்திற்கு முன்பாகவே நமக்கே அறியாமல் கொஞ்சம் தூக்கம் வந்துவிடுகிறது என்பதே யதார்த்தம்.
கிளைமாக்ஸ் ட்விஸ்ட் & பார்ட் 4 லீட்!
படத்தின் மிகப்பெரிய பலமே கடைசி 30 நிமிடங்கள் தான். அங்கேதான் இயக்குனர் மீண்டும் கியரை மாற்றி விறுவிறுப்பைக் கூட்டுகிறார். அந்த ட்விஸ்ட் நிச்சயம் ரசிக்க வைக்கிறது. ஆனால், முந்தைய இரண்டு பாகங்களோடு ஒப்பிடும்போது ஒட்டுமொத்த த்ரில்லின் அளவு இதில் கம்மிதான்.
எல்லாவற்றிற்கும் மேலாக, இந்த கதையை இதோடு முடிக்காமல், அசால்ட்டாக நான்காம் பாகத்திற்கான (Drishyam 4) ஒரு லீடைக் கொடுத்து முடித்திருக்கிறார்கள். 'அப்பாடா ஒரு வழியா முடிஞ்சது' என்று நிம்மதியடைவதற்குள் அடுத்த பாகத்திற்கு ரூட் போட்டதால், தியேட்டரை விட்டு குடுகுடுவென ஓடி வர வேண்டிய சூழ்நிலை உருவாகிவிடுகிறது.
பிளஸ் (Plus Point):
மோகன்லாலின் எதார்த்தமான நடிப்பு.
முதல் பாதியின் திரைக்கதையும், இன்டர்வெல் பிளாக்கும்.
கடைசி 30 நிமிட விறுவிறுப்பு.
மைனஸ் (Minus Point):
இரண்டாம் பாதியின் ஆமை வேக திரைக்கதை.
முந்தைய பாகங்கள் அளவுக்கு இல்லாத த்ரில் மற்றும் சஸ்பென்ஸ்.
பார்ட் 4-க்கான தேவையற்ற இழுபறி போல் தோன்றுவது.
இறுதி தீர்ப்பு (Verdict):
ஜார்ஜ்குட்டி அண்ணன் இம்முறை செய்தது 'மகா' சம்பவம் இல்லை என்றாலும், ஒரு 'மினி' சம்பவமாக ரசிகர்களை ஏமாற்றாமல் கடந்து விடுகிறது. த்ரிஷ்யம் பிரியர்கள் மற்றும் மோகன்லால் ரசிகர்களுக்கான ஒரு சுமாரான த்ரில்லர்!
ரேட்டிங்: 2.75 / 5
இவன் :
ராஜா கே.எஸ் (எழுத்தாளன்)
கருத்துகள் இல்லை:
கருத்துரையிடுக